انشودة المستهلك
للشاعر راى قسم السيد
جات الجودة والتقييس
عشانك انت يا انسان
تقدم ليك كل الخير
وتنشد رفعة السودان
****
تعال كلمنى يا ملوال
تعال أفهمنى يا عثمان
ليه بتشيل أكل فى أكياس
تضر بصحة الانسان
****
مفروض نحنا نتأكد
قبل ما نشيل من الدكان
ما يدونا سلعة قديمة
فايت لزمانها زمان
****
أخيرلك تنتبهه يا أخوى
قبل ما تفقد الحبان
برومات البوتاسيوم ضار
لأنو بسبب السرطان
****
إذا كان كل زول خالف
نبلغ عنو أهل الشان
بتمشى بلدنا لقدام
وننسى آلامنا والأحزان
****
رساله بقولها للتجار
يخافوا الخالق الرحمن
وما يدوا الزبون حاجات
بلا تاريخ ولا عنوان
****
تذكروا انو سيدنا شعيب
زمان وصانا بالاحسان
وما نبخس حقوق الغير
ونوفى الكيل والمـيزان
****
دحين يا محمد أحمد اخوى
وليدك لو رقد عيـــان
مـــا عاينت ديباجات
وماعونك دوام وسخان
****
ادارة الجودة لكل زول
يجود عملك باتقــان
حرام الناس تغش الناس
لانو دا ما من الايمان
****
نحنا نهجنا شرع الله
حماية رقابة واطمئنان
ونحنا مواصفات علمية
للسودان سلام وأمان
****
نحنا هشابة فى دارفور
نار تقابة والقــرآن
نحن التاكا والرجاف
نحن الطابية في أمدرمان
ليست هناك تعليقات:
إرسال تعليق